تحدث الفنان محمود العسيلي عن مطربي المهرجانات أثناء ظهوره مع الإعلامية منى عبد الوهاب ببرنامج “ع المسرح” على قناة الحياة.
قال محمود العسيلي: “أغاني المهرجانات بشكل أو بآخر مبقتش زي الأول ولكنها من الحاجات اللي بحبها جدا وفيه مطرب مهرجانات هو رقم واحد على كل المنصات والمطرب ده ابني بيحبه وحافظ كل أغانيه والجيل الصغير بمختلف الطبقات بيسمعوه وخاصة الناس اللي شبهه، وميعرفوش أغانينا إحنا، والمطرب ده هو عصام صاصا”.
وأضاف محمود العسيلي : “المهرجانات لون جديد ولكنه مصري أصيل وحاجة بتاعتنا ولون الشارع أوي، وأغاني صاصا رقم واحد على كل المنصات وبقوله أنت ناجح جدا وابني بجد بيحبك وبيسمعك هو وكل أصحابه، وأنت فعلاً رقم واحد ودي حاجه مننكرهاش”.
وتابع: “مفيش أي تقليل احترام لـ مطربي المهرجانات، بحب الفنان حسن شاكوش جدا ومؤمن بموهبته وعارف أنه جامد جدا، وبالعكس شجعته لما قابلته وطلبت منه يركز في شغله أكتر ونجاحه بأنه يظهر بحاجات مختلفة تكسر الدنيا”.
يذكر أن عصام صاصا كان قد عبر عن استيائه من تصريح محمود العسيلي بعدم معرفته لاسمه على الرغم من ملاحظته لتصدره لقوائم المنصات، وقال “زعلت لأنها متطلعش من حد عليه القيمة.
انت عارف إن أنا متصدر جميع المنصات ومتعرفش اسمي؟”.
